宜家嘅化妝、修圖技術比以前進步得多，女神、BB幾乎周街都係，不過，如果想知道一個女人係咪堅靚，就要睇吓佢個喊樣係咪都一樣咁正。今日一於同大家介紹喊起上嚟一樣省鏡，仲因此重新得寵嘅美人，佢就係漢武帝嘅第二位皇后衛子夫。

衛子夫出身卑微，原本係漢武帝家姐平陽公主嘅歌女。當時漢武帝劉徹啱啱登基無耐，去拜訪姐姐，公主一早就喺民間準備咗十幾個美人要獻俾細佬，點知漢武帝一個都唔鍾意，公主於是就叫啲歌女出嚟表演，包括衛子夫。點知漢武帝一眼就睇中咗衛子夫，之後公主就梗係順理成章咁送衛子夫入宮侍奉漢武帝，公主仲同衛子夫講他日一朝富貴，千其唔好忘記佢嘅恩情添。之但係，咪話受寵喇，衛子夫入咗宮之後，成年都無見過皇帝，認真陰功豬。

終於有一日，漢武帝話要清理吓後宮，放啲多餘嘅宮女出宮，衛子夫就混喺班宮女入面，一見漢武帝就喊到梨花帶雨咁，哀求話要出宮。漢武帝見到衛子夫喊到我見猶憐咁嘅樣，又一次心動，並且寵幸佢。之後，衛子夫仲有埋身懷六甲，更加得寵。所以話呢，美人除咗要識喊，仲要識得把時機，睇衛子夫就係一個好例子喇。

圖為《衛子夫》劇照，原圖嚟自網絡。